புனிதமானது செவிலியர் பணியே
கைவிளக் கேந்திய காரிகை பிளாரன்ஸ்
நைட்டிங்கேல் இங்கிலாந்தில் பிறந்த நாளை
வையகம் கொண்டாடும் செவிலியர் தினமாய் !
செய்யும் பணிகளில் பலவித முண்டு
பொறுமை சகிப்புத் தன்மை கொண்டு
செவிலியர் செய்வது தொழிலல்ல தொண்டு !
மருத்துவப் பணியின் உன்னத முணர்ந்து
மனித நேயம் கொண்டே சுழல்வார்
மனமது கோணாது சேவைகள் புரிவார் !
மருத்துவர் சொல்லை சிரமேற் கொள்வார்
மறுக்காமல் மறக்காமல் அவர்பணி முடிப்பார்
மகத்துவம் மிக்கது செவிலியர் பணியே !
காலநேரம் கருதாமல் பாரபட்சம் பாராமல்
கடமையே கண்ணாய் கருணையுடன் உழைப்பார்
கவனிப்பில் நோயாளிக்கு கடவுளாய்த் தெரிவார் !
அறுவை சிகிச்சை நடக்கும் போதும்
தீவிர சிகிச்சைக் குட்படும் போதும்
செவிலியர் சேவை இதயம் நிறைக்கும் !
அன்பான பணிவிடையும் ஆறுதல் வார்த்தையும்
நொந்த மனதிற்கு அருமருந்தாய் அமையும்
நோயின் தாக்கத்தை வெகுவாய் குறைக்கும் !
புன்னகை மாறாது அசராது சோராது
புத்துணர்வு பொங்க சேவகம்புரிவார்
புனிதமானது புவனத்தில் செவிலியர் பணியே ...!!!
(இன்று உலக செவிலியர் தினம் )
Comments
Post a Comment